2Ch 30 | NdeIBE | STEP | UHezekhiya wanxusa bonke abako-Israyeli labakoJuda wanxusa labako-Efrayimi labakoManase ngezincwadi, ukuthi bazokudla iPhasika ethempelini likaJehova uNkulunkulu ka-Israyeli.

2 Chronicles 30

UHezekhiya Ugcina IPhasika

1 UHezekhiya wanxusa bonke abako-Israyeli labakoJuda wanxusa labako-Efrayimi labakoManase ngezincwadi, ukuthi bazokudla iPhasika ethempelini likaJehova uNkulunkulu ka-Israyeli. 2 Inkosi lezikhulu zayo lebandla lonke eJerusalema bavumelana ukwenza umkhosi wePhasika ngenyanga yesibili. 3 Babengenelisanga ukwenza umkhosi ngesikhathi sawo ngoba abaphristi babebalutshwana ababezingcwelisile njalo labantu babengabuthananga eJerusalema.

4 Icebo leli lakhanya lilihle enkosini lasebandleni lonke. 5 Baquma ukuthi kukhutshwe ilizwi kulo lonke elako-Israyeli kusukela eBherisheba kusiya koDani, kunxuswa abantu ukuthi beze eJerusalema emkhosini wePhasika likaJehova, uNkulunkulu ka-Israyeli. Umkhosi lo wawungakaze wenziwe ngabanengi kusiya ngomthetho owalotshwa phansi.

6 Ngokulaya kwenkosi, izigijimi zangena kulo lonke elako-Israyeli lelakoJuda ziphethe izincwadi ezazivela enkosini lasezikhulwini zayo, ezazilotshwe ukuthi: “Bantu bako-Israyeli, buyelani kuJehova, uNkulunkulu ka-Abhrahama lo-Isaka lo-Israyeli, ukuze abuyele kulabo benu abaseleyo abaphunyuke ezandleni zamakhosi ase-Asiriya.

7 Lingabi njengaboyihlo lezihlobo zenu ababengathembekanga kuJehova uNkulunkulu wabokhokho benu, waze wabenza baba yisibonelo sokwesabekayo njengoba libona.

8 Lingabi ntamolukhuni njengaboyihlo; zehliseni kuJehova. Wozani endlini yokukhonza aseyingcwelisile kuze kube nininini. Mkhonzeni uJehova uNkulunkulu wenu, ukuze ulaka lwakhe olwesabekayo lusuke kini. 9 Nxa libuyela kuJehova, abafowenu labantwabenu bazafumana umusa kulabo ababathumbayo, babuye kulelilizwe, ngoba uJehova uNkulunkulu wenu ulomusa lesihawu. Kayikulifulathela nxa libuyela kuye.” 10 Ngakho izigijimi zaphuma zangena kuyo yonke imizi lemizana ko-Efrayimi lakoManase, zayafika lakhonale koZebhuluni, kodwa abantu bazihleka ulunya njalo baziklolodela. 11 Lanxa kunjalo, abanye abantu bako-Asheri labakoManase labakoZebhuluni bazithoba baya eJerusalema. 12 Njalo lakoJuda isandla sikaNkulunkulu sasisebantwini ukubapha ukubambana engqondweni ukuze benze lokho inkosi lezikhulu zayo eyayithe abakwenze, njengokutsho kwelizwi likaJehova uNkulunkulu.

13 Kwabuthana abantu abalixuku elikhulu eJerusalema bethakazelela iDili leSinkwa esingelamvubelo ngenyanga yesibili. 14 Basusa ama-alithare eJerusalema bakhucula amaalithare empepha bawathwala bayawaphosela eSigodini saseKhidroni.

15 Babulala amazinyane ezimvu awePhasika ngosuku lwetshumi lane lwenyanga yesibili. Abaphristi labaLevi bayangeka bazihlambulula baletha iminikelo yokutshiswa ethempelini likaJehova. 16 Basebebuyela ezikhundleni zabo zenjayelo njengokumisiweyo emthethweni kaMosi umuntu kaNkulunkulu. Abaphristi bachela igazi ababeliqhutshelwa ngabaLevi.

17 Njengoba babebanengi ababengazihlambululanga exukwini, abaLevi bahlaba amanye amazinyane ezimvu awePhasika besenzela labo ababengahlanjululwanga ngokomkhuba njalo bengelakho ukuzahlukanisela izimvu zabo phambi kukaJehova. 18 Lanxa abantu abanengi ababevela ko-Efrayimi, ko-Manase, ko-Isakhari lakoZebhuloni babe ngakazihlambululi, kodwa badla iPhasika, okwakungekho emthethweni olotshiweyo. Kodwa uHezekhiya wabakhulekela wathi: “Kungathi uJehova, olungileyo, angathethelela bonke 19 abamdingayo uNkulunkulu – uJehova, uNkulunkulu waboyise loba bengahlambulukanga ngokomthetho wendawo engcwele.” 20 Lakanye uJehova wawuzwa umthandazo ka-Hezekhiya wasilisa abantu.

21 Ama-Israyeli ayeseJerusalema athakazelela iDili leSinkwa esingelaMvubelo okwezinsuku eziyisikhombisa ngokujabula okukhulu, abaLevi labaphristi behlabelela kuJehova izinsuku zonke, bephathiswa ngamachacho okudumisa uJehova.

22 UHezekhiya wabakhuthaza bonke abaLevi abatshengisela ukuzinikela emsebenzini kaJehova. Ngalezozinsuku eziyisikhombisa badla leyongxenye eyayiyisabelo sabo njalo banikela umnikelo wobudlelwano bamdumisa uJehova, uNkulunkulu waboyise.

23 Ibandla lonke laselivumelana ukuthakazelela umkhosi lo okwezinye izinsuku eziyisikhombisa; ngakho umkhosi bawuqhuba okwezinye izinsuku eziyisikhombisa bejabula.

24 UHezekhiya inkosi yakoJuda walethela ibandla izinkunzi eziyinkulungwane lezimvu ezizinkulungwane eziyisikhombisa lezimbuzi zingezebandla, kwathi izikhulu lazo zaletha izinkunzi eziyinkulungwane lezimvu lezimbuzi ezizinkulungwane ezilitshumi. Abaphristi abanengi kakhulu bazihlambulula. 25 Ibandla lonke lakoJuda lajabula, ndawonye labaphristi labaLevi labo bonke ababebuthene bevela ko-Israyeli, ndawonye labezizweni ababevela ko-Israyeli lababehlala koJuda. 26 Kwaba lokujabula okukhulu eJerusalema, ngoba kusukela ezinsukwini zikaSolomoni indodana kaDavida inkosi yako-Israyeli kwakungazange kube lomkhosi onjalo eJerusalema.

27 Abaphristi labaLevi bema babusisa abantu, uNkulunkulu wabezwa, ngoba imithandazo yabo yafika ezulwini, endaweni yakhe engcwele ahlala kiyo.